Òpi- wedle Słowión òżëwioné cało zmarłégò, chòdzącé pò swiece nocą, ùnikającé słunecznégò widu. Żëwi sã krewią żëwich. Je całi wachlôrz mòżlewòtów ùnicestwieniô negò stwòra, leno niewiele òne dają, bò Òpi to nosferatu – niesmiertelny. Òb noc to òn je panã, le òb dzéń spi, i tedë je jedinô szansa na pòkònanié gò.
Òpi (wãpierz) przebiérô pòstac szãtopierza. Przóde kôrbiano ò nim pòd dakama słowióńsczich chëczów, straszono nim lëdzy jidącech do òpùszonëch zómków, abò na smãtôrze. Wiara zrodzeła sã z wseczëcô, że złi lëdze nie òpùszczele swiata, le wcyg czenią zło. Jaczis czas temù, ale i dzysô mòżna słëchac historiów ò straszącëch stwòrach, ò krzikach ùczëtich w lasach i na smãtôrzach.
Równak żle szëkómë jifòrmacejów ò nich w czãsto ùżiwónym zdroju wiédze- internecë mùszimë sã namãczec, bë nalézc cos ò słowióńsczim òpim. W pierszi rédze pòjôwiają sã kòmpùtrowé grë ò apòkalipticznëch czasach, czej nad swiatã zaczenają panowac nieùmarłi, abò ò Drakùlë- nôbarżi znónym òpim show-biznesu. Pòtemù są filmë- horrorë, czasã kòmédie ë kòmédiowé parodije horrorów. Òpi robi karierã? Jo!
Mało chto zdaje so sprawã, że ten pòpùlarny stwór je wemesłã najich prastarków. Dzysô wãpierz to belno pòstac na Helloween, wãpirizm to psychiczé schòrzenié, a nawetk młodzeznowô subkùltura! Òstaje pitanié: na kùli òpi, jadące ze swòjima zãbama i bladą, zemną twarzą w swiat òstôł naszim òpim? Naszim òpim, ò jaczim kôrbialë w karczmach kòmùdné kôrbionczi, starkòwie straszëlë dzôtczi, że wdzele kòl dodomù céń tegò stwòra…
Wôrt je zrobic pòrównanié słowióńsczégò wãpierza z tim zôpadnym, hollywoodzczim, internetowim…
a)Wezdrzatk:
-słowióńsczi òpi mô dłudżé kłë (na Biôłorusë je to dłudżi jãzek). Je grëbi (ąpir- òpiti krewią), brzedczi, szkarłatny i òdrażający. Jegò cało je ju w jaczims stãpniu rozkłôdu.
-Hollywood widzy wãpierza jinaczi. Coprôwda nie òdebrało mù jegò broni i bùsznotë- zãbów, zwëkòwò je téż bladi jak scana; ale nie je to gnijącé, rëszającé sã cało, le szëkòwny młodi chłop, czãsto z aristokraticznégò rodu (Drakùla). Białczi nie są przez niegò atakòwóné, same do niegò jidą.
b) Òfiarë
-Wedle wierzeniów òfiarama òpigò je rodzezna, chterna nie dopôłniła òbrządkù pòchówkù. Czasã je to téż białka zmarłégò, chteren nie wrócył z wòjnë żëwi. Jesz jednyma célama wãpierzów są lëdze, chternym nie ùdało sã jich pòkònac (np. nie trafile kòłkã prosto w serce)
-Dzysô bez òpich napadóné są spòsobné białczi, chternych krew barżi szmakô. Célã je téż chtos, chto béł procemnikã za żëcô.
c) Òbleczenié
-nasz òpi òbleczony je w to, w czim gò pòchòwają. Westãpùje jakno szãtopierz, ale czede mô lëdzką pòstac, jegò ruchna są brudné, durawé i smierdzącé trupã.
Gdze sã pòdzôł nen straszny, dzëczi stwór? Show biznes zrobił z tegò półzwiérza gwiôzdã, cygnącą za sobą brutczi, pòjôwiającą sã na balach, jimprezach (nasz wãpierz bòji sã lëdzy i widu, nigdë bë nie szedł na bal)
Co je równak pòwòdã taczégò zajinteresowaniô zemsczim żëcym pò smierce? Kò jistniało òno długò przed słowiónama, w strzédnowieczu i zazadaptowało sã do naszëch czasów. Dzysô karna młodzeznë òblokają sã w pelerinë, pùdreją sã, żebë wezdrzec jak wãpierze, chcą sã z nima ùjuwerniac. Dlôczë? Stwòrë żëjącé òb noc wiedno bëłë ë bãdą jinspiracëją…
